До 18 часот денеска на територијата на државата се регистрирани вкупно 11 пожари на отворен простор, од кои еден е сè уште активен, додека 10 се целосно изгаснати, информира Центарот за управување со кризи.
Активен останува пожарот во Општина Василево, каде што гори депонија во селото Василево.
Во текот на денот пожарникарите успеале да изгаснат 10 пожари на повеќе локации низ државата. Изгаснати се пожарите во дебарското село Гари, каде што гореле ниска вегетација и нискостеблеста мешана шума, како и во Општина Центар Жупа, каде што бил зафатен земјоделски имот.
Изгаснати се и пожарите кај валандовското село Касандол, во селата Житоше и Локвени во Општина Долнени, во битолската населба Мал Париз, како и во населбата Драчево во Општина Аеродром.
Пожарникарите интервенирале и кај селото Блаце во Општина Чучер-Сандево, на улицата „Брњачка Буна“ во Општина Шуто Оризари, на патниот правец Тетово – Брвеница, како и во кратовското село Железница, каде што горела депонија.
Надлежните апелираат граѓаните да бидат внимателни и да избегнуваат активности кои можат да предизвикаат пожари на отворен простор, особено во услови на високи температури.
