До 18 часот регистрирани 14 пожари низ Македонија – осум се активни

На територијата на Македонија до 18 часот денеска се регистрирани вкупно 14 пожари на отворен простор, од кои осум се активни, еден е ставен под контрола, а пет се целосно изгаснати, информира Центарот за управување со кризи.

— реклама —

Активни пожари има во осум општини. Во Прилепско гори ниска вегетација на повеќе краци од подрачјето на селото Чаниште, кон Крушевица, Лопатица, Дуње и Црна Река.

Пожар е активен и во мешана шума на потегот Моране–Вртекица–Рамни Габер во Општина Студеничани, како и кај месноста Видуш, кај селата Драгов Дол и Локвица во Македонски Брод, каде што гори ниска вегетација, нискостеблеста шума и грмушки.

— реклама —

Во Кичевско активен е пожарот кај селото Тајмиште, во месноста Дарда, каде што гори високостеблеста букова шума. Пожар има и кај селото Никуштак во Општина Липково.

— реклама —

Во Општина Крушево повторно се активирал пожарот кај селото Белушино, со крак кон Јакреново, каде што огнот е ставен под контрола. Активни се и пожари кај селото Лопате во Кумановско и кај Ломница во Општина Врапчиште.

Под контрола е ставен пожарот на депонијата во Делчево.

— реклама —

Во текот на денот се изгаснати пет пожари – кај селото Форино во Гостиварско, Церово во Желино, Мусинци во Могила, Марена во Кавадарци и на депонијата во селото Златари во Ресенско.