Од вкупно 11 пожари на отворен простор, регистрирани во текот на денот, два и натаму се активни, еден е ставен под контрола, а осум се целосно изгаснати, информира Центарот за управување со кризи.
Според податоците, заклучно со 18 часот, активни се пожарите кај селото Рапеш во Општина Новаци, каде што гори ниска вегетација, и кај селото Говрлево во Општина Сопиште, каде што се зафатени ниска вегетација и нискостеблеста шума.
Под контрола е ставен пожарот на потегот од селото Белица во Општина Македонски Брод кон месноста Јасен во Општина Сопиште. Таму пожарот зафатил нискостеблеста и мешана шума.
Во текот на денот се изгаснати уште осум пожари. Интервенции имало кај селото Раовиќ во Општина Сарај, на улиците „Алпи“ и „Боро Менков“ во Општина Бутел, кај селото Мралино во Општина Илинден, меѓу селата Еднокуќево и Моноспитово во Општина Босилово, на улицата „Вера Циривири“ во Велес, како и кај селата Враништа и Мислешево во Струшко.
