До 18 часот денеска во земјава се регистрирани вкупно 22 пожари на отворен простор, од кои 11 се активни, еден е ставен под контрола, а 10 се изгаснати, информира Центарот за управување со кризи.
Активни пожари има во повеќе општини. Во Делчево гори борова шума во месноста Бигла, додека во Пехчево пожарот е во борова шума кај селото Црвник.
Во Куманово, кај селото Винце, гори ниска вегетација, при што се зафатени и куќи. Пожар е активен и во Струга, на потегот од селото Делгожда кон Долно Татеши.
Во прилепско активни се два пожара – кај селата Бонче и Лопатица, каде што гори ниска вегетација, односно нискостеблести растенија.
Пожар има и на подрачјето меѓу општините Студеничани и Зелениково, на потегот Моране – Вртекица – Рамни Габер, со крак кон Палиград, како и над селото Вражале во Зелениково, каде што гори мешана шума.
Во Студеничани активен е и пожарот кај Цветово, на стариот пат кон Елово, каде што гори ниска вегетација и ниска шума.
Во Македонски Брод активни се пожари на месноста Видуш, кај селото Драгов Дол и кај Локвица, каде што се зафатени ниска вегетација, нискостеблеста шума и грмушки.
Пожар е активен и кај селото Тајмиште, во месноста Дарда, во Општина Кичево, каде што гори високостеблеста букова шума, како и кај селото Церово, во Општина Желино, каде што пожарот зафатил ниска вегетација и папрат на непристапен терен.
Пожарот во селото Церово, Општина Маврово и Ростуше, е ставен под контрола. Таму гори ниска вегетација и нискостеблести растенија.
Во текот на денот изгаснати се 10 пожари, во Врапчиште, Теарце, Липково, Бутел, Петровец, Тетово, Струга, Македонски Брод и Кривогаштани.
