До 18 часот регистрирани 23 пожари на отворен простор, осум се активни

Во текот на денот, до 18:00 часот, во земјава се регистрирани вкупно 23 пожари на отворен простор, информира Центарот за управување со кризи.

— реклама —

Од нив, осум пожари се активни, еден е ставен под контрола, додека 14 се целосно изгаснати.

Активни пожари има на територијата на општините Студеничани и Зелениково, Гостивар, Чашка, Градско, Прилеп, Македонски Брод, Кавадарци и Виница.

— реклама —

Најсериозна е состојбата кај пожарот во атарот на селата Моране, Вртекица и Рамни Габер, со крак кон Палиград и над Вражале, каде што гори мешана шума. Пожар има и кај Гостивар, во селото Трново, со ширење кон Битово и Заград, каде што е зафатена ниска вегетација и папрат.

— реклама —

Активни пожари има и над Нежилово во Општина Чашка, меѓу Долно Чичево и Подлес во Општина Градско, кај селото Коњаре во Општина Прилеп, меѓу резерватот „Јасен“ и селото Брезница, како и на градската депонија „Мелци“ во Кавадарци и зад салонот за мебел „Мебел Ви“ во Виница.

Пожарот кај селото Тајмиште, месноста Дарда, во Општина Кичево, каде што гори високостеблеста букова шума, е ставен под контрола.

— реклама —

Во текот на денот се изгаснати вкупно 14 пожари, меѓу кои и пожари во Сарај, Гостивар, Куманово, Берово, Струмица, Кичево, Струга, Делчево, Пробиштип, Гази Баба и Чучер Сандево.