На територијата на земјава денеска до 18 часот се регистрирани вкупно 24 пожари на отворен простор, од кои 15 се активни, еден е ставен под контрола, а осум се изгаснати, информира Центарот за управување со кризи (ЦУК).
Најголем број активни пожари има во скопскиот регион. Во општините Студеничани и Зелениково гори мешана шума на потегот Моране – Вртекица – Рамни Габер, со крак кон Палиград и над Вражале. Пожар е активен и кај Цветово, на стариот пат кон Елово, каде што гори ниска вегетација и ниска шума.
Во Сарај, кај Горна Матка и Семениште, гори ниска вегетација, додека пожар е регистриран и кај бензинската пумпа „Макпетрол“ во Драчево, на патот кон Китка, каде што се зафатени ниска вегетација и ниска шума.
Активни пожари има и во Македонски Брод, Кичево, Врапчиште, Маврово и Ростуше, Желино, Тетово и Прилеп. Кај селото Тајмиште во Кичево гори високостеблеста букова шума, додека кај Ломница и Ѓурѓевиште во општина Врапчиште е зафатена мешана шума.
Во општина Прилеп активни се четири пожари – кај селата Бонце, Мажунчиште и Мало Коњари, како и во близина на „Орион Инженеринг“. На овие локации гори ниска вегетација и нискостеблести растенија.
Пожар е активен и на подрачјето на општините Струмица и Василово, кај Водоча, Баница и Софила, како и кај Ангелци и Градашорци. Таму се зафатени стрниште и ниска вегетација.
Еден пожар е ставен под контрола во општина Прилеп, кај Чаниште, со краци кон Крушевица, Лопатица, Дуње и кон Црна Река. Таму гори ниска вегетација.
Од ЦУК информираат и за осум пожари што се изгаснати. Меѓу нив е пожарот кај депонијата во Делчево, како и пожари во близина на Кажани во Битола, кај градските гробишта во Штип, кај Велешта во Струга, Никуштак во Липково, Стари Лозја во Куманово и во месноста Мерата во Валандово.
Во општина Крушево, кај Белушино, пожарот повторно се активирал, додека пожарот кај Јакреново е ставен под контрола. Зафатени се ниска вегетација и дабова шума.
