Повеќе пожари на отворен простор беа евидентирани до 20 часот во Скопскиот регион, а благодарение на брзата реакција на пожарникарите и надлежните служби, најголемиот дел од нив се ставени под контрола или целосно се изгаснати, соопшти Центарот за управување со кризи (ЦУК).
Според информациите од ЦУК, гореле претежно сува и ниска вегетација, како и овоштарник, а по сите пријави веднаш интервенирале екипи на Бригадата за противпожарна заштита на Град Скопје.
Под контрола или целосно изгаснати се пожарите во Волково, Кучевишка Бара, Катланово, Кадино на патот кон Ајватовци, Лисиче кај Чатал, Бунарџик, Катлановска Сушица и на потегот Добри Дол – Терминал во Општина Сопиште.
Во моментот пожарникарите сè уште интервенираат на три локации – во атарот на селото Блаце кај Катланово, во Општина Петровец, на влезот во селото Сушица, во Општина Петровец, каде што гори овоштарник, како и во селото Страхојадица, во Општина Зелениково, каде што е зафатена сува трева.
Од ЦУК наведуваат дека благодарение на навремената реакција, добрата координација на сите ангажирани служби и пожртвуваноста на пожарникарите, состојбата во најголемиот дел од Скопскиот регион е ставена под контрола. Дополнително, Центарот координира и со Дирекцијата за заштита и спасување за обезбедување дополнителна поддршка и надзор на терен, со цел целосно ликвидирање на преостанатите активни жаришта.
