До 20 ноември студентите можат да аплицираат за една од 3.000 стипендии, првпат и за студенти со попреченост и ретки болести

Студентите имаат рок до 20 ноември да аплицираат за стипендија за академската 2026/2027 година. Министерството за образование и наука годинава ќе додели вкупно 3.000 стипендии, исто колку и минатата година, но со нов модел на распределба, кој предвидува нови категории и поинакво насочување на финансиската поддршка.

Пријавувањето на конкурсот се врши исклучиво електронски, преку порталот e-uslugi.mon.gov.mk.

— реклама —

Од Министерството појаснуваат дека целта не е намалување на поддршката, туку нејзино подобро насочување кон потребите на студентите, академскиот успех и образованието на кадар во области од стратешко значење за државата.

— реклама —

Од вкупниот број, 1.200 стипендии се наменети за социјална поддршка. Во оваа категорија првпат се воведуваат посебни стипендии за студенти со попреченост и за студенти со ретки болести, со по 50 стипендии за секоја група.

Новиот модел предвидува и 1.050 стратешки стипендии за студенти на студиски програми од особено значење за развојот на државата. Тие се однесуваат на областите математика, физика, хемија, земјоделство, шумарство, наставна биологија и рударство.

— реклама —

Дополнителни 750 стипендии ќе добијат студенти со висок академски успех, односно со просечна оценка од најмалку 8,50 и редовно исполнување на студиските обврски.

— реклама —

Месечниот износ на стратешките стипендии е 18.000 денари, додека стипендиите за социјална поддршка и висок академски успех изнесуваат 6.050 денари. Исплатата ќе се врши во текот на девет месеци од студиската година.

Во тек е и пријавувањето на уште два конкурса за академската 2026/2027 година – за доделување 15 стипендии на студенти запишани во прва година на студиски програми по македонски јазик, како и за поврат на средства за купен музички инструмент.