До пладне регистрирани седум пожари на отворен простор, пет сè уште се активни

До 12 часот денеска на територијата на државата се евидентирани седум пожари на отворен простор, од кои пет се активни, а два се целосно изгаснати, информира Центарот за управување со кризи (ЦУК).

— реклама —

Активни пожари се регистрирани во Општина Шуто Оризари, кај Џиди Комерц, каде што гори ѓубре и сува трева, во Општина Старо Нагоричане, во селото Ругинце, каде огнот зафатил ниска вегетација, стрништа и сува трева, како и во Општина Дојран, кај селото Сретеново, каде гори шума.

— реклама —

Пожари се активни и во Општина Велес, покрај автопатот Велес–Штип, во близина на Чолошево, каде гори ниска вегетација и сува трева, како и на градската депонија во Велес, каде е зафатено ѓубре.

— реклама —

Во меѓувреме, изгаснати се пожарите во селото Житоше, Општина Долнени, во близина на училиштето, каде гореле ниска вегетација и сува трева, како и пожарот во битолското село Кукуречани, каде горело ѓубре.

— реклама —

Надлежните служби остануваат на терен и апелираат до граѓаните да бидат внимателни и да не палат оган на отворено, особено во услови на високи температури.