Кабинетот на украинскиот претседател Володимир Зеленски побара од државното обвинителство да ја разгледа можноста за покренување кривична постапка против претседателот на Белорусија, Александар Лукашенко, се наведува во писмо објавено денеска.
Како што пренесува „Ројтерс“, кабинетот на украинскиот претседател одговорил на барањето на организацијата „Белоруски демократски форум“, која дејствува во егзил.
Организацијата во мај испратила писмо до Зеленски со барање Украина да покрене постапка против Лукашенко за воени злосторства, геноцид и „државен тероризам“.
Форумот го обвинува Лукашенко за соучесништво во руската војна против Украина, како и за присилно префрлање на најмалку 2.442 украински деца во Белорусија, во рамки на програма што ја документирала Хуманитарната истражувачка лабораторија при Универзитетот „Јејл“.
Администрацијата на Александар Лукашенко не одговорила на барањето на агенцијата за коментар.
Лукашенко уште во 2023 година изјави дека Белорусија привремено прифатила одреден број украински деца за да им помогне да закрепнат од траумите предизвикани од војната.
Високиот претставник во кабинетот на претседателот на Украина, Олег Татаров, го известил Форумот дека нивното барање е проследено до обвинителството со молба да „ги преземе соодветните мерки“ доколку за тоа постојат законски услови.
Неговото писмо го објави „Белорускиот демократски форум“.
Според „Ројтерс“, во последните недели Зеленски зазеде поостар став кон Лукашенко.
Минатиот месец му упати ултиматум да ги отстрани станиците за пренос на сигнал за кои Киев тврди дека им помагаат на руските беспилотни летала во нападите врз Украина.
Лукашенко овој месец повтори дека нема да испрати белоруска војска во војната, но продолжи да го поддржува рускиот претседател Владимир Путин на други начини, вклучително и со дозволување Русија да распореди тактичко нуклеарно оружје во Белорусија, како и да ги користи белоруските воени бази и полигони за обука.
