Гласачите во 61 град и општина во Албанија во недела бираат градоначалници, а на половина од овие места нема противкандидати за владејачките социјалисти, пишува „Дојче Веле“ (ДВ).
Покрај тоа, опозицијата повика на бојкот и смена на премиерот Еди Рама, а постои и страв од насилни конфликти на денот на изборите, поради што властите ангажираа и воени командоси.
„Најавените локални избори во Албанија се сè освен плуралистички“, пишува ДВ, бидејќи опозицискиот сојуз предводен од Демократската партија (ПД) ги бојкотира изборите.
На последните локални избори во 2015 година, опозицијата освои 48 отсто од гласовите. Затоа гласањето закажано за недела, на 30 јуни, повеќе се смета за референдум за социјалистичката влада на Еди Рама, а само во половина од локалните самоуправи се јавуваат противкандидати.
Пред четири месеци, целиот опозициски блок ги врати своите мандати и целосно го напушти албанскиот парламент. Наместо тоа, опозициските партии и нивните поддржувачи излегоа на улиците, обвинувајќи ја владата за корупција и изборна измама со купување гласови на парламентарните избори во 2017 година, притоа барајќи оставка на премиерот Рама и предвремени избори. Албанскиот премиер константно ги негира и одбива ваквите обвинувања.
„Сепак, западот ја критикува опозицијата”, тврди ДВ, и наведува дека САД и ЕУ кои ја признаваат владата на Рама и изборите во 2017 година го критикуваат бојкотот, главно поради повлекувањето на опозицијата од парламентот.
Рама, пак, во пресрет на утрешните избори порача дека опозицијата на нив ќе го добие конечниот удар, кој, како што вели, ќе го означи крајот на политиката која ја држела албанската држава како заложник цели 30 години.
