Тројца планинари беа успешно евакуирани од непристапен терен на Шар Планина, откако на едно од лицата ненадејно му се влошила здравствената состојба за време на планинарењето, соопшти Министерството за внатрешни работи.
Според информациите, на 11 јули во 18:46 часот, А.Ч. (38) од село Жеровјане побарал помош за себе и уште две лица – Н.М. од село Слатино и Б.А. од село Глоѓи. Тие со возило пристигнале до местото „Три води“ во атарот на село Теарце, а потоа пешки се упатиле кон Шар Планина.
За време на движењето, на А.Ч. одеднаш му се влошила здравствената состојба, при што почувствувал болки во градите и отежнато дишење.
По пријавата веднаш биле известени Полициското одделение Теарце и Територијалната противпожарна единица од село Лешок. Н.М. и Б.А. успеале да го симнат А.Ч. до местото „Бачило“, каде што ги пречекала спасувачката екипа.
Групата заедно со спасувачите пешки се спуштила до нивното возило, а во 20:40 часот кај местото „Три води“ биле преземени од полициски службеници. Потоа безбедно биле спроведени до регионалниот пат кај село Лешок, каде што ги чекала екипа на Итната медицинска помош.
А.Ч. по полноќ, во 00:55 часот на 12 јули, со возило на Итната медицинска помош бил пренесен во Клиничката болница во Тетово за укажување лекарска помош.
