Студиото „Ворнер Брос“ сака да сними продолжение на филмот „Барби“, но преговорите со главните ѕвезди сè уште не се завршени, поради што проектот е ставен под знак прашалник.
Според британскиот „Гардијан“, извршниот директор на студиото, Дејвид Заслав, засега не е подготвен да ги одобри договорите што би им овозможиле на Марго Роби и Рајан Гослинг удел во заработката од филмот.
Се наведува дека Гослинг, кој за улогата на Кен беше номиниран за Оскар, бара хонорар од 20 милиони долари. Од „Ворнер Брос“, пак, тврдат дека никогаш не бил постигнат конечен договор за таков модел на соработка.
Режисерката Грета Гервиг и нејзиниот сопруг и косценарист, Ноа Баумбах, наводно, веќе имаат идеја за продолжението, но не сакаат да ја претстават пред студиото сè додека не завршат преговорите.
Студиото се обидува да постигне договор пред декември, кога правата за франшизата повторно ќе преминат кај компанијата „Мател“. Доколку тоа не се случи, „Мател“ би можел да започне нов проект со поинаков режисер, нова актерска екипа и нов концепт.
Филмот „Барби“, кој беше објавен во јули 2023 година, заработи повеќе од 1,4 милијарди долари на светско ниво и стана еден од најголемите филмски хитови во последните години.
