Еквадорскиот претседател Даниел Нобоа прогласи вонредна состојба на 60 дена, откако водачот на една од најголемите криминални банди во земјата, Адолфо Масијас, побегна од затвор каде што издржуваше казна.
„Само што потпишав указ за вонредна состојба за вооружените сили да ја имаат сета политичка и правна поддршка за нивните постапки. Помина времето кога дилерите на дрога, убијците и организираниот криминал и диктираа на владата што да прави“, рече Нобоа.
За време на вонредната состојба армијата ќе биде распоредена на улиците и во затворите, а ќе биде воведен и ноќен полициски час, пренесува Ројтерс.
Вчера Адолфо Масијас, водачот на криминалната банда Лос Чонерос, исчезна од затворот каде издржуваше казна од 34 години.
Вонредната состојба беше прогласена во понеделникот, а последиците од неа се меѓу првите големи безбедносни предизвици за Нобо, кој ја презеде функцијата во ноември, ветувајќи дека ќе се бори против зголеменото насилство во јужноамериканската земја.
Затворската агенција на Еквадор соопшти дека во понеделникот имало „инциденти“ во шест од преполните затвори во земјата.
Во затворите во Еквадор често се судири меѓу ривалските банди, а од 2021 година во нив починале повеќе од 400 затвореници.
