Оштетена е опрема за метеоролошко следење во нуклеарната електрана Запорожје, соопшти Меѓународната агенција за атомска енергија, предупредувајќи на нов ризик за безбедноста во најголемата нуклеарка во Европа.
Тим на агенцијата на терен констатирал дека дел од лабораториската опрема за надворешно следење на радијацијата повеќе не е во функција, откако била погодена со дрон. Инцидентот се случува во услови на постојани обвинувања меѓу Украина и Русија за напади во близина на електраната.
Генералниот директор Рафаел Гроси повторно повика на „максимална воена воздржаност“ околу нуклеарните објекти, нагласувајќи дека секој напад во нивна близина носи сериозни безбедносни ризици.
Електраната Запорожје, која има шест реактори, е под контрола на руските сили од почетокот на инвазијата во февруари 2022 година. Во моментов не произведува електрична енергија, но останува критично важно нејзиното одржување, особено системите за ладење на нуклеарното гориво.
Дополнително, еден од клучните надворешни далекуводи, неопходен за безбедно функционирање на системите, е во дефект од крајот на март. Од МААЕ информираат дека се обидуваат да посредуваат за локално примирје за да се извршат неопходните поправки.
Ова е уште еден во низата инциденти што ја држат Запорожје во фокусот на меѓународната загриженост, со оглед дека секое нарушување на безбедносните системи може да има далекусежни последици.
