Белорусија побара официјално и детално објаснување од Украина по нападот врз автобус во кој се превезувале деца од Белорусија кон Русија, соопшти белоруското Министерство за надворешни работи.
Од Министерството наведуваат дека инцидентот го сметаат за нов чин на тероризам насочен против цивили.
„Сметаме дека станува збор за уште еден терористички акт против цивилното население“, изјави портпаролот на Министерството, Руслан Варанков.
Според информациите што ги објави гувернерот на Брјанската област, Јегор Ковљачук, автобусот бил погоден во напад со дрон, за кој руските власти ги обвинуваат украинските сили.
Во автобусот се наоѓале деца од Белорусија, членови на фудбалски клуб, кои патувале кон Геленџик на одмор.
Во нападот загинала жена, која била придружник на децата, додека шест деца се здобиле со повреди.
По инцидентот реагираше и руското Министерство за надворешни работи. Портпаролката Марија Захарова нападот го оцени како „терористички напад на киевскиот режим“.
„Ова е уште еден терористички напад на киевскиот режим, кој ги таргетира цивилите, а особено децата“, изјави Захарова.
Украинските власти засега не се огласија во врска со обвинувањата.
