Романски државјанин бил лишен од слобода на граничниот премин Табановце, откако системот „Безбеден град“ утврдил дека со автомобил „Ауди“ возел со повеќе од двојно поголема брзина од дозволената.
Од МВР информираат дека на 4 септември во 11:20 часот, на излез од државата, полициски службеници го лишиле од слобода 49-годишниот Х.В.С. од Романија.
При проверката било утврдено дека истиот ден околу 6:30 часот на автопатот А1, во близина на Демир Капија, тој управувал со возилото со брзина од 163 километри на час, иако на делницата максимално дозволената брзина била 80 километри на час.
Полицијата констатирала дека Романецот бил евидентиран како сторител на кривично дело по член 297-а од Кривичниот законик, односно „безобѕирно управување со моторно возило“.
Тој бил спроведен во Полициската станица од општа надлежност Неготино за понатамошна постапка. Од МВР информираат дека против него ќе биде поднесена соодветна кривична пријава.
