ДУИ до ВЛЕН: Зошто не се осмелувате да го споменете Иван Стоилковиќ?

ДУИ излезе со остра реакција кон коалицијата ВЛЕН, обвинувајќи ја дека молчи во однос на ставовите и постапките на вицепремиерот Иван Стоилковиќ, особено во контекст на неговите ставови за Ратко Младиќ и, како што наведуваат од партијата, „продорот на српскиот свет“ во Северна Македонија.

Од ДУИ велат дека институциите на Европската Унија го осудиле глорифицирањето на лица осудени за воени злосторства и прашуваат зошто ВЛЕН не го осудува Стоилковиќ.

— реклама —

„Зошто ВЛЕН не се осмелува ниту да го спомене името на Иван Стоилковиќ? Со што ги уценува тој?“, прашуваат од ДУИ.

Од партијата тврдат дека ВЛЕН во повеќе наврати го штител Стоилковиќ – преку гласања во Собранието, молчење на неговите, како што наведуваат, напади и навреди кон албански пратеници, но и преку политичка поддршка на неговите одлуки.

— реклама —

ДУИ во соопштението отвора и пошироко прашање за влијанието на Србија во земјава. Од партијата наведуваат дека во изминатиот период биле присутни повеќе активности и политички случувања кои, според нив, укажуваат на зголемен продор на интереси поврзани со таканаречениот „српски свет“.

Како примери ги посочуваат посетите на српски политички функционери, активностите поврзани со Милорад Додик, како и случувањата во енергетскиот, банкарскиот, телекомуникацискиот и медиумскиот сектор.

— реклама —

Од ДУИ посочуваат и на договори и проекти поврзани со Северна Македонија, Србија и други регионални партнери, оценувајќи дека тие отвораат, како што велат, „сериозни прашања за продорот на ова влијание“.

Во реакцијата, ДУИ го обвинува ВЛЕН и за молчење по однос на изјавата на Стоилковиќ во која, според нив, Република Косово била наречена „Косово и Метохија“.

Од партијата на крајот директно прашуваат кога ВЛЕН ќе побара разрешување на Стоилковиќ и неговите функционери.

„Колку подолго молчите, вашето молчење не е неутралност, туку политичка заштита и соодговорност“, наведуваат од ДУИ, повикувајќи го ВЛЕН или да побара отстранување на оние кои, според нив, ги глорифицираат воените злосторници, или да ја напушти Владата.