Водостојот на Дунав кај Батина во Хрватска достигна историски најниско ниво од -101 сантиметар, што е за 17 сантиметри пониско од досегашниот рекорд измерен во 2022 година. Поради повлекувањето на водата, на површината се појавија неексплодирани бомби од Втората светска војна.
Според хрватските власти, поради екстремно нискиот водостој дошло и до промена на водниот режим, а експертите предупредуваат дека тоа има сериозни последици врз екосистемот, рибниот фонд, каналите за наводнување и пловниот сообраќај.
Пронајдените експлозивни направи биле деминирани на самото место.
Во Батина сè уште има голем број неексплодирани бомби, бидејќи за време на Втората светска војна на тоа подрачје се воделе жестоки борби.
Битката кај Батина, во областа Барања, се водела од 11 до 29 ноември 1944 година меѓу единиците на советската Црвена армија и Народноослободителната војска на Југославија, од една страна, и германскиот Вермахт и унгарските сили, од друга. Целта на операцијата била да се запре напредувањето на Црвената армија кон Будимпешта и Виена.
