„Дупката во ПИОМ е 40%, власта ги загрозува пензиите на стотици илјади граѓани“, вели Филипче

Претседателот на СДСМ, Венко Филипче, на денешната прес-конференција обвини дека актуелната власт повторно го продлабочува дефицитот во Фондот за пензиско и инвалидско осигурување (ПИОМ), со што, според него, се загрозува стабилноста на пензискиот систем.

Филипче посочи дека за време на владите предводени од СДСМ дефицитот во ПИОМ бил значително намален, но откако на власт дошла сегашната Влада, повторно почнал да расте.

— реклама —

„Кога владата на Социјалдемократскиот сојуз на Македонија во 2017 година го затекна фондот со дефицит од 50 проценти, тој дефицит постепено се намалуваше со цел да биде сѐ постабилен и да може редовно да исплаќа пензии. Дефицитот од 50 проценти се намали на 30 проценти со еден стабилен систем. Откако дојде оваа власт во 2024 година, дупката повторно се зголемува и сега надминува 40 проценти“, изјави Филипче.

— реклама —

Според него, актуелната состојба значи дека недостигаат речиси половина од средствата потребни за исплата на пензиите.

„Тоа значи дека 40 проценти од парите недостигаат и се надоместуваат од централниот буџет за да можат актуелните пензионери да ги добиваат своите пензии“, рече Филипче.

— реклама —

Тој оцени дека наместо стабилизирање на пензискиот систем, Владата создава дополнителна несигурност кај сегашните и идните пензионери.

— реклама —

„Луѓето се исплашени дали воопшто ќе ги добијат тие пари назад и што точно се крие зад изјавата на премиерот. Тоа е уште еден многу тежок удар врз граѓаните“, истакна лидерот на СДСМ.

Филипче порача дека пензионерите заслужуваат сигурност и достоинствен живот, додавајќи дека државата мора да обезбеди стабилен и одржлив пензиски систем, без да ги доведува во прашање стекнатите права и заштедите на граѓаните.