„Два сценарија на Мицкоски за Алта банка - ниту едно не држи“, велат од СДСМ

СДСМ преку соопштение обвини дека двете можни решенија што премиерот Христијан Мицкоски ги понудил за случајот со „Алта банка“ не даваат одговор на клучните прашања за загубите и средствата на граѓаните и државните институции.

— реклама —

Од опозициската партија велат дека првото сценарио, пронаоѓање купувач за банката, засега нема реализација, бидејќи, според нив, ниту една сериозна финансиска институција не би презела банка со нарушена репутација, сомнежи за потеклото на капиталот и истраги што се водат во Србија, Црна Гора и Европската Унија.

Како второ сценарио, СДСМ го посочува стечајот, потсетувајќи дека банката во Србија веќе се наоѓа во стечајна постапка по одземањето на дозволата за работа.

— реклама —

Од СДСМ предупредуваат дека исплатата на осигурените депозити до 30.000 евра не значи дека сите штедачи ќе ги добијат своите средства во целост. Партијата дополнително го отвори прашањето за парите на јавните претпријатија, односно средствата на граѓаните што се наоѓаат во банката.

— реклама —

Опозицијата побара од Мицкоски да соопшти колкав износ државни пари е депониран во „Алта банка“, колкава е нејзината актива и врз основа на кои процени се очекува преостанатите доверители да се наплатат од стечајната маса.

Во реакцијата СДСМ се повика и на случајот со српската „Алта банка“, наведувајќи дека претходно се говорело за речиси 400 милиони евра во трезорот, но дека подоцна било утврдено оти сопственикот Давор Мацура веќе ги изнел средствата.

— реклама —

Од партијата побараа целосно објавување на податоците за средствата на граѓаните и државата, а упатија и обвинувања кон премиерот Мицкоски и гувернерот Трајко Славески, тврдејќи дека ќе треба да понесат одговорност за случајот.