Двајца турски државјани се соочуваат со кривична пријава за изнуда, откако, според сомнежите на полицијата, со закани и уцени присилиле двајца жители на Гостивар да преземат финансиски дејствија на сопствена штета.
Надворешната канцеларија за криминалистички работи Гостивар поднела кривична пријава против Т.Д. (55) и З.Д. (54), двајцата од Турција, поради постоење основи за сомнение за сторено кривично дело „изнуда“.
Според пријавата, двајцата, во периодот од 2019 до 2026 година, преку закани го принудиле 66-годишен жител на Гостивар, заедно со неговиот 41-годишен син, да им предадат изработено злато со вкупна тежина од 43 килограми и 800 грама.
Како што информира МВР, пријавените самоволно ја определувале вредноста на златото како стопена суровина, наместо како изработени производи, кои имале значително повисока пазарна вредност.
Дополнително, во текот на февруари 2025 година, според полициските наоди, двајцата со уцени и заканувачки пораки упатени кон синот и неговото семејство го принудиле 66-годишниот гостиварец да потпише преддоговор за купопродажба на недвижен имот.
Во пријавата се наведува дека содржината на преддоговорот не му била прочитана пред нотар во Гостивар.
