Двајцата Бугари осудени за шпионажа во корист на Русија се ослободени и депортирани од Велика Британија

Двајца од бугарските државјани осудени во Велика Британија за шпионажа во корист на Русија се ослободени од затвор и се депортирани, објавија британските медиуми.

Според објавите, станува збор за Вања Габерова и Иван Стојанов, кои биле пуштени на слобода по издржување на задолжителната половина од затворските казни.

— реклама —

Габерова во мај 2025 година беше осудена на шест години затвор, додека Стојанов доби казна од пет години и три недели.

На нивното ослободување реагираше истражувачкиот новинар Христо Грозев, кој беше една од целите на шпионската група.

— реклама —

„Двајца од шпионите кои минатата година добија затворски казни во Велика Британија за шпионирање против мене и Роман Доброхотов, како и за заговор за наше киднапирање или убиство, беа ослободени откако ја издржаа задолжителната половина од казната. Жал ми е што никој не се потруди да ги извести жртвите“, изјави Грозев, пренесува британскиот весник „Експрес“.

— реклама —

Вања Габерова во Велика Британија беше позната како „кралица на трепките“, прекар што го добила откако во 2019 година победила на натпревар во индустријата за убавина.

Габерова и Стојанов беа дел од групата од шест бугарски државјани кои беа осудени на вкупно 50 години затвор поради шпионажа во корист на Русија.

— реклама —

Според британското обвинителство, групата, предводена од австрискиот државјанин Јан Марсалек, спроведувала операции за следење низ Велика Британија и Европа, насочени кон новинари, руски дисиденти, политички личности и украински војници.

Британските медиуми наведуваат дека двајцата биле ослободени согласно законските правила, по издржување на задолжителниот дел од затворската казна, по што биле депортирани од Обединетото Кралство.