Две лица повредени при пад на летало во Хрватска

Две лица се повредени денеска при пад на моторен змеј на подрачјето меѓу Сењ и Свети Јурај во Хрватска.

— реклама —

Од Полициската управа личко-сењска информирале дека пријавата за несреќата била примена во 13:57 часот. Првично било пријавено дека се урнал параглајдер, но подоцна било утврдено дека станува збор за моторен змеј.

На местото на несреќата биле упатени полициски службеници од Полициската станица Сењ, припадници на Јавната противпожарна единица од Сењ и екипа на Хрватската горска служба за спасување од Госпиќ.

— реклама —

Двете лица биле пронајдени во подрачјето на местото Некиќи. Тие се здобиле со полесни телесни повреди и немале видливи скршеници, но биле пренесени во Клиничкиот болнички центар во Риека за дополнителни прегледи.

— реклама —

Од полицијата соопштија дека повредените не се животно загрозени, но лекарските прегледи треба да исклучат можни внатрешни повреди. Двете лица се хрватски државјани.

На местото на падот се врши полициски увид, а за несреќата се известени и Агенцијата за истражување на несреќи во воздушниот, поморскиот и железничкиот сообраќај, како и надлежното жупаниско државно обвинителство.

Причините и околностите за падот засега не се познати.