Еден необичен потег на осуденик на смрт во американската држава Тексас предизвикал значајна промена во затворскиот систем и довел до укинување на традицијата за посебен последен оброк пред егзекуција.
Станува збор за Лоренс Расел Бруер, осуден за убиство извршено од расна омраза, кој во 2011 година побарал раскошен оброк составен од два похувани говедски стекови, троен чизбургер со сланина и голема пица.
Сепак, кога храната му била послужена, тој одбил да изеде ни залак, објаснувајќи дека не е гладен. Овој потег предизвикал бурни реакции, по што Тексас ја укинал можноста осудениците да нарачуваат специјален последен оброк.
Денес, околу дванаесет американски сојузни држави сè уште им дозволуваат на осудениците на смрт да изберат последен оброк, но правилата значително се разликуваат. Во некои држави, како Флорида и Оклахома, постојат строги ограничувања за цената на оброкот, додека во други без исклучок се служи само стандардната затворска храна.
Едно правило, сепак, е заедничко речиси насекаде – алкохолот е строго забранет. Во повеќето затвори алкохолните пијалаци се сметаат за недозволени, а на листата на забранети производи се наоѓаат и тутунските производи. Според историските податоци, последниот затвореник на кој му било дозволено да испие жесток пијалак бил Мануел Фернандез во 1835 година, кој во последните мигови испушил и пура.
Кога станува збор за изборот на последниот оброк, многумина се одлучуваат за храна што им буди спомени и чувство на утеха. Серискиот убиец Џон Вејн Гејси Помладиот побарал пржено пилешко од „КФС“, 12 пржени ракчиња, помфрит и половина килограм јагоди. Тимоти Меквеј, осуден за бомбашкиот напад во Оклахома Сити, избрал две големи чаши сладолед со вкус на нане и парчиња чоколадо.
Истражување на Универзитетот Корнел, кое анализирало 193 последни оброци, покажало дека најчесто се избира пржена храна. Меѓу најпопуларните јадења се стековите, чизбургерите со сланина и похуваното пилешко, додека како прилог најчесто се бараат помфрит, пире од компири и пржени кромидови прстени.
Од десертите, најбарани се сладоледот, питата со јаболка и различните видови торти, а од пијалаците најчесто се избираат газирани пијалаци, ладен чај и овошни сокови.
