Двојно признание за Тања Кочовска и Тони Михајловски на фестивалот во Никшиќ

Првенците на Македонскиот народен театар, Тања Кочовска и Тони Михајловски, освоија две фестивалски награди на 22. Меѓународен фестивал на глумецот – Никшиќ 2026 за своите улоги во претставата „Страв и надеж“.

— реклама —

Кочовска ја доби наградата за најдобра женска епизодна улога, додека Михајловски беше награден за најдобра машка епизодна улога. Претставата, во адаптација и режија на Татјана Мандиќ Ригонат, беше дел од годинашната фестивалска програма.

Жирито во образложението ја истакна нивната заедничка сцена, оценувајќи дека нивната игра била трагикомична и исполнета со човечка топлина.

— реклама —

— реклама —

Одлуката ја донесе стручно жири во состав: Миодраг Кривокапиќ, како претседател, Даница Максимовиќ и Стеван Вуковиќ. Наградите на свеченото доделување ги прими директорот на МНТ, Никола Кимовски, во име на наградените актери.

— реклама —

Од Македонскиот народен театар посочуваат дека ова признание е уште една потврда за актерскиот квалитет на Кочовска и Михајловски, кои како тандем добиваат фестивалски награди на различни театарски фестивали за различни претстави.