Астрономите за првпат по долго време имаа можност да ја набљудуваат експлозивната смрт на масивна ѕвезда речиси од самиот почеток до крајот, што им овозможи нови сознанија за процесот на создавање супернова.
Набљудувањата започнале во март, кога кинескиот вселенски телескоп „Einstein Probe“ регистрирал краткотраен блесок на рендгенски зраци. Станува збор за сигнал што се создава кога ударниот бран, предизвикан од експлозијата во јадрото на ѕвездата, ќе ја пробие нејзината површина.
Според научниците, ваков феномен се случува при секоја супернова, но исклучително ретко се забележува бидејќи трае многу кратко. Последен пат ваков настан бил регистриран во 2008 година.
По првичното откритие, астрономите ги насочиле и рендгенскиот телескоп „Чандра“, како и повеќе копнени телескопи, следејќи ја ѕвездата речиси три месеци, сè додека суперновата не исчезнала зад Сонцето.
Ѕвездата се наоѓала на околу 500 милиони светлосни години од Земјата, во релативно блиска галаксија. Пред експлозијата се проценува дека имала маса околу 30 пати поголема од Сонцето.
Истражувачите сметаат дека по експлозијата останала црна дупка – исклучително густ космички објект со толку силна гравитација што ниту светлината не може да избега од неа.
Резултатите од двете истражувања се објавени во научното списание Astrophysical Journal Letters.
