Мили Боби Браун и Дејвид Харбор, кои светската публика ги запозна како Елевен и Џим Хопер во хит-серијата „Stranger Things“, повторно ќе ги толкуваат улогите на татко и ќерка, но овој пат во нова шпионска драма на Нетфликс.
Проектот веќе доби зелено светло од стриминг-платформата, а покрај главните улоги, Браун и Харбор ќе бидат и извршни продуценти. Сценариото го потпишува наградуваниот Џек Торн, кој исто така е дел од продукцискиот тим.
Според информациите објавени од „Tudum“, Дејвид Харбор ќе го игра Мет Вулф, поранешен агент на ФБИ кој по нарушената кариера работи како советник за безбедност. Неговиот живот повторно се менува кога неговата отуѓена ќерка Ребека, која ја игра Мили Боби Браун, исчезнува за време на тајна мисија.
Ребека, која тргнала по стапките на својот татко и станала агент на ФБИ, исчезнува за време на опасна задача, принудувајќи го Вулф повторно да се врати во светот на шпионажата што одамна го напуштил.
Од Нетфликс изразија задоволство од повторната соработка со актерската екипа.
„Воодушевени сме што оваа шпионска драма ќе ја реализираме со извонреден тим со кој веќе успешно сме соработувале. Џек Торн има извонредна способност да раскаже длабоко човечка приказна во рамки на возбудлив трилер. Убедени сме дека гледачите ќе уживаат во повторната средба на Мили Боби Браун и Дејвид Харбор, овојпат како отуѓени татко и ќерка“, изјави Џини Хау, директорка за драмска програма на Нетфликс за САД и Канада.
Новата серија го означува враќањето на Џек Торн на Нетфликс по успехот на серијата „Adolescence“, која освои награди „Еми“ и „Златен глобус“ и стана втора најгледана англиска серија во историјата на платформата со повеќе од 142 милиони прегледи.
Серијата, која сè уште нема официјален наслов, ќе биде дел од новата генерација драмски продукции на Нетфликс, заедно со проекти како „BEEF“, „Man on Fire“, „East of Eden“ и други.
