Едно лице загина, а уште три се повредени во тешка сообраќајна несреќа што се случила синоќа на регионалниот пат Кичево–Македонски Брод.
Несреќата била пријавена во ОВР Кичево околу 20 часот, а во неа учествувале две патнички возила – „мазда“, управувана од 75-годишниот Д.С. од Кичево, и „хјундаи“, управуван од 75-годишниот А.С. од селото Преглово.
Од здобиените повреди, на местото на несреќата починал возачот на „хјундаито“, а смртта ја констатирал лекар од Итната медицинска помош.
Возачот на „маздата“ се здобил со тешки телесни повреди. Повредени се и двајцата сопатници во „хјундаито“ – 15-годишник од Преглово и 21-годишен жител на Пласница. Тие биле пренесени на лекување во Медицинскиот центар во Кичево и во Комплексот клиники „Мајка Тереза“ во Скопје.
На местото на несреќата бил извршен увид од јавен обвинител и увидна екипа од ОВР Кичево.
