Србија побара помош од Европската унија за справување со големиот број пожари што веќе неколку дена беснеат низ земјата. Министерот за внатрешни работи, Ивица Дачиќ, изјави дека преку Механизмот за цивилна заштита на ЕУ е побарано испраќање противпожарни авиони, хеликоптери и возила.
Во пожарите досега загина едно лице, а повеќе луѓе се повредени. Особено тешка е состојбата во природниот резерват Делиблатска Печара, каде што досега изгореле повеќе од 3.500 хектари шума и ниска вегетација.
Во гаснењето, покрај хеликоптери на српското Министерство за внатрешни работи и припадници на армијата, од четвртокот е вклучен и рускиот авион „Иљушин“.
Работата на пожарникарите ја отежнуваат силниот ветер и непристапниот песоклив терен. Дополнителен проблем претставува и подземното горење на хумусот, поради што огнот повторно се активира и на места за кои се смета дека се изгаснати.
