Еден загинат во Кувајт по ирански напад, оштетена зграда на кинеска компанија

Во ирански напад е погоден објект на кинеска компанија во северниот дел на Кувајт, при што зградата е сериозно оштетена, а еден работник загинал, соопштија кувајтските вооружени сили.

Нападот се случил само неколку часа откако јорданската противвоздушна одбрана пресретнала пет проектили лансирани од Иран.

— реклама —

Претходно, американската Централна команда (ЦЕНТКОМ) соопшти дека успешно завршила нов бран воздушни напади врз Иран, како одговор на претходниот ирански ракетен напад врз американска база во Јордан.

Според ЦЕНТКОМ, погодени биле десетици цели на Иранската револуционерна гарда, меѓу кои командни центри, постројки за ракети и беспилотни летала, како и системи за крајбрежен надзор и одбрана.

Јорданските власти потврдија дека сите проектили биле пресретнати и дека нема жртви.

— реклама —

Новата ескалација повторно ги зголеми стравувањата од поширок вооружен конфликт во регионот, а американските медиуми предупредуваат дека продолжувањето на борбите дополнително ги троши резервите на напредна муниција на САД, неопходна за заштита на нивните бази и сојузници.

Иранската новинска агенција ИРНА, пак, објави дека во американски напад врз островот Кешм, во близина на Ормускиот Теснец, загинале три лица, а две биле повредени.

— реклама —

Во меѓувреме, британската компанија за поморска безбедност „Амбри“ соопшти дека напади со беспилотни летала предизвикале пожари на два брода за транспорт на течен природен гас во египетското пристаниште Дамиета. Според египетските власти, првичната истрага покажува дека пожарите биле предизвикани од дронови, но засега не е потврдено кој стои зад нападот.

Доколку се потврди вмешаност на Иран или неговите сојузници, тоа би значело дополнително проширување на конфликтот.

Во исто време, Саудиска Арабија ја засили реториката кон Иран. Според извори запознаени со разговорите, саудискиот министер за одбрана, принцот Калид бин Салман, на средбите со американскиот претседател Доналд Трамп и потпретседателот Џеј Ди Венс порачал дека Ријад нема да толерира напади врз својата нафтена инфраструктура, но истовремено повикал на смирување на тензиите и враќање на преговорите меѓу Вашингтон и Техеран.

Паралелно со тоа, јеменските Хути повторно ја интензивираа својата кампања против Саудиска Арабија. Тие соопштија дека со дронови нападнале нафтени постројки што се користат за транспорт на нафта кон пристаништето Јанбу на Црвеното Море.

Сателитски снимки анализирани од агенцијата „Асошиејтед прес“ покажуваат оштетувања и на постројката за преработка на нафта на компанијата „Арамко“ во Абкаик, еден од најважните нафтени комплекси во Саудиска Арабија.