„Единствено во периодот на власт на Заев и Филипче преку Еуростандард банка, во Македонија се „испрале“ пари од Венецуела“, вели ВМРО-ДПМНЕ

ВМРО-ДПМНЕ преку соопштение обвини дека во периодот на владеењето на СДСМ, Зоран Заев и Венко Филипче, преку Еуростандард банка биле префрлани средства од Венецуела, чиј вкупен износ, според информациите што ги наведува партијата, достигнувал 1,6 милијарди евра.

— реклама —

Од партијата тврдат дека првата транша изнесувала 110 милиони евра, а во наводната шема била вклучена и македонска компанија која купувала вештачко ѓубриво од фирма во Белорусија. Средствата потоа, според соопштението, биле префрлени на сметка во Србија, каде што биле замрзнати по барање на обвинителството.

— реклама —

ВМРО-ДПМНЕ наведува дека во случајот се отвораат прашања и за наводни деловни врски со компании поврзани со семејството Заеви и нивни деловни партнери, кои добивале милионски кредити од Еуростандард банка, но не ги враќале. Меѓу нив партијата ги посочува „Сара инженеринг“, „Глобал медија груп“ и „Тритерол“.

— реклама —

Во соопштението се споменуваат и прашања за односите на тогашната власт со бизнис-интереси поврзани со Русија, Белорусија и Србија, како и за доделувањето пасоши, тендери и носењето урбанистички планови.

— реклама —

Од ВМРО-ДПМНЕ оценуваат дека овие случаи отвораат сомнежи за поврзаност меѓу политичката моќ и сомнителни деловни интереси и бараат одговорност од сите инволвирани. Наводите изнесени во партиското соопштение не претставуваат независно утврдени факти.