Советот на Општина Пехчево едногласно ја отфрли иницијативата за изградба на дата-центар во градот. На денешната седница, сите девет советници гласаа против предлогот.
Против иницијативата се изјаснија пет советници од ВМРО-ДПМНЕ и коалицијата, тројца од СДСМ и коалицијата и еден советник од Движењето ЗНАМ.
Одлуката следува по повеќенеделните реакции во јавноста околу најавениот проект и начинот на кој се одвивала постапката. Како главни забелешки беа посочени недоволната информираност за инвеститорот, како и отворените прашања за потрошувачката на вода и електрична енергија.
Дел од јавноста изрази загриженост и за можните последици врз природата и животната средина, но и за недоволната вклученост на граѓаните и стручната јавност во процесот.
Против изградбата на дата-центарот во изминатиот период се изјаснуваа и граѓански активисти, кои бараа постапката да биде запрена. Реакции имаше и од ДОМ и Левица, од каде што беа побарани поголема транспарентност и конкретни одговори за влијанието на проектот врз локалната заедница и природните ресурси.
По расправата, претставниците на советничките групи порачаа дека интересите на жителите на Пехчево треба да бидат приоритет и дека за идни инвестиции од ваков карактер мора да има целосни информации, стручни анализи и транспарентна постапка.
