Економијата на Македонија забележала значително забрзување во вториот квартал од годинава, со годишен раст на БДП од 4,3 проценти, наспроти 3,1 процент во првото тримесечје.
Според Руди Лукачиќ, аналитичар за макроекономија и пазари на капитал во „Блумберг Адрија“, главен двигател на растот биле инвестициите, кои во реални услови се зголемиле за 16,5 проценти. Особено силен раст од 21,9 проценти е забележан во градежништвото.
„Тоа покажува дека економското забрзување било релативно широко распространето, а не само резултат на потрошувачката“, вели Лукачиќ.
Потрошувачката на домаќинствата пораснала за 3,3 проценти, додека извозот се зголемил за 10,4 проценти. Сепак, увозот пораснал уште побрзо, за 12,5 проценти, со што бил ограничен придонесот на надворешната трговија кон вкупниот економски раст.
Растот не се должи само на ниската споредбена основа од минатата година. БДП во вториот квартал пораснал и 1,3 проценти на квартално ниво, по растот од само 0,4 проценти во првите три месеци од годината, што, според Лукачиќ, потврдува дека економската активност се засилува.
Аналитичкиот тим на „Блумберг Адрија“ засега останува на својата прогноза од почетокот на годината дека македонската економија во 2026 година ќе оствари раст од 2,9 проценти. Проценката, како што наведува Лукачиќ, ќе биде преиспитана откако ќе бидат објавени податоците за третиот квартал.
