Се разгледува можноста за воведување работна недела од четири дена

Потрошувачката кошница за четиричлено домаќинство во септември изнесувала 58.117 денари, што е за 358 денари помалку во споредба со август. Сепак, во однос на јануари годинава, таа е зголемена за 1.736 денари, односно за 3,1 процент. Податоците беа презентирани на седницата на Економско-социјалниот совет, на која се разговараше и за работата во недела, неработните денови и можноста за воведување четиридневна работна недела.

— реклама —

Министерот за економија и труд, Бесар Дурмиши, истакна дека новата методологија има цел да обезбеди потранспарентен и пореален приказ на трошоците на домаќинствата, кој ќе послужи како основа за креирање економски и социјални политики.

— реклама —

Според Министерството, пресметката опфаќа 11 категории трошоци и 101 прехранбен производ. Се користат податоци од Државниот завод за статистика за осум градови, цени на овошјето и зеленчукот од 23 пазари, како и информации од пет големи и три регионални трговски синџири.

Дурмиши појасни дека разликите меѓу одделните пресметки произлегуваат од различниот опфат, структурата и изворите на податоци. Најголеми отстапувања има кај храната и пијалаците, облеката и обувките, образованието, домувањето и комуналните трошоци. Во категориите за одржување на домаќинството, рекреација и култура, пресметката на Министерството покажува повисоки вредности.

— реклама —

Министерот нагласи дека податоците треба да бидат основа за конструктивна дискусија и носење мерки што ќе придонесат за подобрување на животниот стандард и зачувување на куповната моќ на граѓаните.

На седницата на Економско-социјалниот совет биле разгледани и прашањата за неработните денови, работата во недела, можноста за воведување четиридневна работна недела и регулирањето на пензискиот стаж. Дурмиши посочи дека за овие теми е потребно внимателно разгледување и усогласување на ставовите на социјалните партнери.