Индустрискиот комплекс Рас Лафан, кој претставува клучен столб на енергетскиот сектор на Катар, беше погоден од силна експлозија и пожар за време на рестартирањето на гасната постројка Барзан. Според катарските власти, во инцидентот се повредени 54 лица, додека по 18 сè уште се трага.
Инцидентот се случил во неделата вечерта за време на рестартирањето на постројката, а од „Катар Енерџи“ потврдија дека на местото веднаш биле распоредени екипи за итна интервенција и дека пожарот е ставен под контрола.
Министерството за внатрешни работи на Катар соопшти дека во тек се интензивни операции за пребарување и спасување, во кои учествуваат Катарската меѓународна група за пребарување и спасување и тимови на цивилната одбрана.
Властите засега ја припишуваат експлозијата на техничка несреќа и нагласуваат дека нема истекување што би претставувало закана за јавната безбедност.
Според очевидци, силна експлозија се слушнала и во главниот град Доха, кој се наоѓа јужно од индустрискиот комплекс Рас Лафан, што укажува на интензитетот на инцидентот.
Постројката Барзан има клучна улога во снабдувањето на домашниот пазар со природен гас. Инцидентот се случил за време на обновувањето на работата на постројката, откако производството во Рас Лафан било прекинато на 2 март, кога катарското Министерство за одбрана соопшти дека комплексот бил цел на напад со два дрона, лансирани од Иран.
„Катар Енерџи“ засега не соопштува дали експлозијата предизвикала структурни оштетувања на постројката, ниту дали инцидентот ќе влијае врз снабдувањето со природен гас.
Индустрискиот град Рас Лафан претставува центар на енергетскиот сектор на Катар и е клучен за преработката и извозот на течен природен гас, со што земјата е меѓу водечките светски извозници на овој енергенс.
Надлежните најавија детална истрага за утврдување на причините за експлозијата, додека потрагата по исчезнатите лица продолжува.
