Екстремните горештини годинава предизвикаа рекорден број смртни случаи во Германија и Велика Британија, при што, според официјалните проценки, во двете земји досега починале речиси 13.000 луѓе како последица на високите температури.
Институтот „Роберт Кох“ соопшти дека до 19 јули во Германија се регистрирани околу 9.800 смртни случаи поврзани со жештините, што е највисок број за истиот период од 2016 година наваму.
Повеќе од 5.000 од овие случаи се поврзуваат со силниот топлотен бран што ја зафати земјата во втората половина на јуни, кога температурите во многу региони достигнаа околу 40 Целзиусови степени.
Според германските здравствени власти, високите температури ретко се директна причина за смрт, но значително го зголемуваат ризикот кај лицата со кардиоваскуларни, белодробни и бубрежни заболувања, особено кај постарите граѓани.
Алармантни бројки се регистрирани и во Велика Британија. Агенцијата за здравствена безбедност на Обединетото Кралство процени дека во текот на двата топлотни бранови во мај и јуни имало 2.877 смртни случаи поврзани со високите температури.
Од нив, околу 753 случаи се поврзуваат со жештините кон крајот на мај, а уште 2.124 со топлотниот бран што ја зафати земјата во втората половина на јуни.
Британските здравствени власти предупредуваат дека бројките сè уште се прелиминарни, но веќе укажуваат дека оваа година би можела да биде рекордна по бројот на смртни случаи предизвикани од екстремните горештини.
Експертите предупредуваат дека климатските промени носат сè почести, подолги и поинтензивни топлотни бранови, поради што повикуваат на дополнителни инвестиции во заштита на најранливите категории граѓани, како и на подобра подготвеност на болниците, домовите за стари лица и другите јавни установи.
