Озлогласениот наркобос Хоакин Ел Чапо Гузман повторно се огласи од затвор, барајќи итно екстрадирање во Мексико, со тврдење дека во САД му се прекршени основните човекови права.
Во рачно напишано писмо испратено до судијата Брајан Коган, Гузман инсистира на „еднаков третман пред законот“ и бара да му се суди во неговата татковина за преостанатите обвиненија.
Поранешниот лидер на картелот Синалоа издржува доживотна казна затвор од 2019 година и се наоѓа во строго чуваниот затвор ADX Флоренс во Колорадо. Ова не е првпат да се жали на условите – и во претходни обраќања укажувал на, како што наведува, неправеден третман и прекршување на процесните права.
Во најновото писмо, испратено кон крајот на април, тој повторно тврди дека во неговиот случај не биле презентирани клучни докази, што, според него, влијаело врз исходот на постапката. Затоа бара да му се овозможи враќање во Мексико и ново судење.
Неговиот адвокатски тим предупредува на сериозни здравствени и психолошки последици поради строгите услови во затворот. Адвокатката Мариел Колон изјави дека Гузман значително ослабел и имал епизоди на тахикардија.
„Го држат во исклучително тешки услови. Според мое мислење, тие се нехумани и го кршат американскиот Устав“, изјави таа.
ADX Флоренс важи за еден од најстрогите затвори во светот, каде што затворениците минуваат поголем дел од времето во изолација.
