Претседателот на СДСМ, д-р Венко Филипче, на денешната прес-конференција изрази сериозна загриженост за предлогот за воведување електронско гласање на дијаспората, оценувајќи дека ваквото решение отвора простор за масовни злоупотреби и изборни манипулации.
Според Филипче, предложениот модел не нуди доволни гаранции за проверка на идентитетот на гласачите и може да доведе до неконтролиран изборен процес.
„Тоа отвора ризик за масовно и неконтролирано гласање. Станува збор за многу опасен систем кој отвора врата за изборни манипулации и кражба“, изјави Филипче.
Тој нагласи дека дополнителен проблем претставува фактот што начинот на спроведување на електронското гласање не е прецизно уреден во самиот закон, туку се остава да биде регулиран со подзаконски акти што ќе ги донесе Државната изборна комисија.
„Наместо вакво важно прашање да биде јасно дефинирано со закон, се остава на подзаконски акти, што дополнително го зголемува ризикот од злоупотреби“, рече претседателот на СДСМ.
Филипче оцени дека предложените измени не претставуваат демократски реформи, туку, како што рече, обид на власта однапред да обезбеди механизми за влијание врз изборниот процес.
