Инфлацијата во Германија повторно се приближи до границата од три отсто во април, достигнувајќи 2,9 отсто на годишно ниво, соопшти германската статистичка служба „Дестатис“. Тоа е највисоко ниво од јануари пред две години, а последен пат инфлацијата била над три отсто во декември 2023 година.
Главна причина за растот е наглото поскапување на енергенсите, предизвикано од војната во Иран и затворањето на клучни поморски рути за транспорт на нафта. Домаќинствата во април плаќале за енергија 10,1 отсто повеќе отколку една година претходно, додека во март зголемувањето изнесувало 7,2 отсто.
Економистите предупредуваат дека поскапувањето на енергијата веќе почнува да се пренесува и на останатите производи и услуги. Во април храната поскапела за 1,2 отсто, рестораните за 2,8 отсто, а се очекува зголемување и на цените на авионските билети и туристичките аранжмани.
Според експерти од „Комерцбанк“, растот на цените на горивата е клучен двигател на инфлацијата, но се очекува дополнителен притисок врз економијата поради повисоките трошоци за производство и транспорт.
Германската влада воведе мерки за ублажување на поскапувањата, меѓу кои се ограничување на дневните промени на цените на бензинските пумпи и привремено намалување на данокот на горивото. Сепак, економистите оценуваат дека овие мерки се недоволни и нецелосни.
Прогнозите за инфлацијата за оваа година веќе се ревидирани нагоре, а аналитичарите предупредуваат дека новиот бран економски притисоци може да продолжи и во следните години, зависно од развојот на ситуацијата на Блискиот Исток.
