Бугарија се соочува со епидемија на мали сипаници, при што досега се регистрирани 446 заболени, од кои дури 368 се деца, покажуваат најновите податоци на бугарското Министерство за здравство, пренесува порталот Novinite.
Според официјалните информации, случаите се евидентирани во 11 области, а најголем број заразени има во Враца, каде што се регистрирани повеќе од 220 случаи. Значителен број заболени има и во областите Плевен и Ловеч.
Заразени лица се пријавени и во Монтана, Софија и Софиската област, Варна, Русе, Видин, Перник и Трговиште.
Од вкупниот број заболени, 228 лица не биле вакцинирани против морбили поради возраста или други причини, додека за 37 лица не е познат нивниот вакцинален статус.
Од почетокот на ширењето на болеста, здравствените власти во Бугарија аплицирале 48.826 дози од вакцината против мали сипаници, заушки и рубеола (ММР).
Морбилите се високо заразна вирусна болест, а вакцинацијата против неа е задолжителна во Бугарија. Имунизацијата се спроведува на возраст од 13 месеци, со ревакцинација по навршени 12 години, а вакцината е бесплатна за граѓаните.
