Бројот на починати од легионерска болест во Њујорк се искачи на шест, додека вкупно 90 лица се заразени во епидемијата што го зафати квартот Апер Ист Сајд на Менхетен, во близина на Централ Парк.
Градските здравствени власти соопштија дека од 17 јули не се регистрирани нови случаи на заболувањето. Во моментов шест пациенти се хоспитализирани, додека 65 лица од почетокот на епидемијата се пуштени на домашно лекување.
Властите информираа дека десетици разладни кули, во кои била откриена бактеријата Legionella, се исчистени и дезинфицирани.
„Уверени сме дека изворот на бактеријата е отстранет“, соопшти њујоршката здравствена служба.
Легионерската болест е тежок облик на воспаление на белите дробови, кој настанува по вдишување на бактерии Legionella преку ситни водени капки во воздухот. Болеста не се пренесува од човек на човек, туку најчесто се појавува кога бактеријата ќе се размножи во водоводни системи, како што се тушеви, бојлери, чешми и разладни кули.
Според американскиот Центар за контрола и превенција на болести (CDC), бактеријата најлесно се размножува во топла вода и при повисоки температури.
Иако повеќето пациенти успешно закрепнуваат со антибиотска терапија, болеста може да биде опасна, па дури и смртоносна, особено кај лица со ослабен имунитет или со хронични заболувања на белите дробови.
