Бигорскиот манастир информира дека на празникот посветен на Светите рамноапостолни сесловенски просветители и учители, браќата Кирил и Методиј, ќе се одржат свечени богослужби во бигорскиот скит во селото Битуше, кој е посветен токму на светите браќа.
Во сабота, на 23 мај, со почеток во 18 часот ќе биде отслужена празнична вечерна богослужба, со која ќе претстои Епископот Антаниски г. Партениј.
Следниот ден, во недела на 24 мај, во 07:30 часот ќе започне утрената богослужба, а во 09:00 часот ќе се отслужи Света архијерејска литургија со која ќе чиноначалствува Епископот Антаниски г. Партениј.
„Во храмот кој се наоѓа во напредна фаза на изградба и оваа година молитвено ќе се собереме, за да испросиме од Бога и од Светите Браќа благослов и поскоро завршување на нивниот нов дом“, соопштија од Бигорскиот манастир.
По завршувањето на богослужбите, во дворот на скитот ќе се одржи и културно-уметничка програма.
На литургијата ќе присуствуваат сите монашки заедници под духовното раководство на владиката Партениј – братството на Бигорскиот манастир, како и сестринствата од Рајчица и Пречиста.
„Христос воскресе!“, стои во објавата испратена со благослов на Епископот Антаниски г. Партениј, игумен на Свештената Бигорска Обител.
