Турскиот претседател Реџеп Таип Ердоган изјави дека Турција никогаш нема да ги остави кипарските Турци без поддршка и дека нема да дозволи да се повторат, како што рече, страдањата од минатото.
По седницата на Владата во Анкара, Ердоган се осврна на одбележувањето на 52-годишнината од турската воена интервенција на Кипар во 1974 година, оценувајќи дека 20 јули претставува историска пресвртница со која биле обезбедени опстанокот, слободата и безбедноста на кипарските Турци.
„Турција, како и пред 52 години, ниту денес ниту утре, нема да дозволи да се повтори страдањето од минатото и никогаш нема да ги остави своите кипарски браќа сами“, изјави Ердоган.
Тој предупреди и на, како што рече, обидите за милитаризација на Кипар, нагласувајќи дека ниту една иницијатива во Источниот Медитеран што ги игнорира правата и интересите на кипарските Турци, нема да биде успешна.
Според Ердоган, кипарското прашање не е само спор околу поделбата на власта, туку прашање на признавање на суверената еднаквост и еднаквиот меѓународен статус на кипарските Турци.
Тој ја поздрави и неодамнешната посета на генералниот секретар на Обединетите нации, Антонио Гутереш, на островот, истакнувајќи дека Анкара останува во тесна комуникација со ОН.
Во своето обраќање, Ердоган најави продолжување на инвестициите во Северен Кипар, со цел регионот да стане лидер во туризмот, високото образование, технологијата и дигиталната трансформација.
Осврнувајќи се и на состојбата на Блискиот Исток, турскиот претседател повторно ја критикуваше политиката на Израел, оценувајќи дека израелските активности на палестинските територии се главен извор на нестабилност во регионот.
