Ердоган: Турција нема да ги остави кипарските Турци без поддршка

Турскиот претседател Реџеп Таип Ердоган порача дека Турција никогаш нема да ги остави кипарските Турци без поддршка и нема да дозволи да се повторат, како што рече, страдањата од минатото.

По седницата на Владата во Анкара, Ердоган се осврна на 52-годишнината од турската воена интервенција на Кипар во 1974 година, оценувајќи дека 20 јули претставува историска пресвртница која ја обезбедила безбедноста, слободата и опстанокот на кипарските Турци.

— реклама —

„Како и пред 52 години, Турција и денес, а и во иднина, нема да дозволи повторување на трагедиите од минатото и нема да ги остави своите кипарски браќа сами“, изјави Ердоган.

— реклама —

Осврнувајќи се на случувањата во Источниот Медитеран, турскиот претседател предупреди на, како што рече, обиди за милитаризација на островот и нагласи дека ниту една иницијатива што ги занемарува суверените права и интересите на кипарските Турци нема да биде успешна.

Ердоган повтори дека според Анкара, кипарското прашање не е само спор за поделба на власта, туку пред сè прашање на признавање на суверената еднаквост и меѓународниот статус на кипарските Турци. Според него, претходните предлози за решавање на спорот пропаднале затоа што не ги земале предвид овие принципи.

— реклама —

Тој ја поздрави и неодамнешната посета на генералниот секретар на Обединетите нации, Антонио Гутереш, на Кипар, истакнувајќи дека Турција ќе продолжи со блиска соработка со ОН во врска со ова прашање.

Ердоган најави продолжување на инвестициите во Северен Кипар, со цел тој да стане регионален центар за туризам, високо образование, технологија и дигитална трансформација.

Во своето обраќање, турскиот претседател повторно упати критики и кон Израел, обвинувајќи го дека со својата политика придонесува за нестабилност на Блискиот Исток преку, како што рече, окупацијата на палестинските територии и кршењето на меѓународното право.