Кувајт соопшти дека неговите вооружени сили пресретнале „непријателски ракети и беспилотни летала“ истрелани од правец на Иран, додека продолжува ескалацијата на конфликтот меѓу Техеран и Вашингтон.
Министерството за енергетика информира дека во последните два дена биле погодени постројки за производство на електрична енергија и за десалинизација на морска вода. Во нападите избувнал пожар што го нарушил производството на електрична енергија, а пожарникарските екипи работат на неговото локализирање.
Кувајт најголемиот дел од питката вода го обезбедува преку постројки за десалинизација, од кои потекнуваат околу 90 проценти од резервите за водоснабдување.
Во меѓувреме, воздушна тревога повторно беше прогласена и во соседен Бахреин. Министерството за внатрешни работи ги повика граѓаните да останат смирени и да се засолнат на безбедни места.
Јорданските вооружени сили и израелската армија соопштија дека Иран извршил ракетен напад кон територијата на Јордан. Според јорданската војска, три ракети биле пресретнати, додека четвртата паднала во ненаселено подрачје. Засега нема информации за жртви или материјална штета.
Сирени за воздушна опасност се огласиле во повеќе делови на земјата, а на снимки објавени на социјалните мрежи се гледа како јорданската противвоздушна одбрана пресретнува ракети над Акаба.
Новата ескалација следува откако вчера во Јордан загинаа двајца американски војници, а еден се води како исчезнат по ирански напад. Со тоа дополнително се продлабочуваат судирите меѓу САД и Иран, кои се интензивираа по пропаѓањето на привремениот договор постигнат минатата недела.
