Адвокатот Владимир Туфегџиќ со саркастичен коментар реагираше на последниот извештај на Европската комисија, осврнувајќи се на измените на Кривичниот законик донесени во 2023 година.
Според него, македонските власти ја убедиле Европската унија дека измените претставуваат само привремено решение до донесување на нов Кривичен законик, иако, како што тврди, поради начелото на примена на поблагиот закон, нивните последици остануваат трајни.
„Го читам извештајот на ЕК и сега капирам каква измама е направена 2023 со измените на КЗ. Замисли сме им продале приказна на Европјаните дека измените биле, пази формулација, ‘преодно решение’ до ново и целосно законско решение, а не сме им кажале дека ‘преодново решение’ е у ствари трајно решение. Потрајно здравје, пошто важи поблаг закон секако за трајно“, напиша Туфегџиќ.
Тој додава дека Европската комисија во своите извештаи и натаму го повторува очекувањето за трајно законско решение.
„Како и да е, секоја чест за нашиве што успеале да им продадат ваква приказна, и најјако е што во секој извештај Европјаниве го верглаат истото и чекаат, замисли, ‘трајно решение’, а у ствари сè е одамна трајно решено, а они никако да сконтаат“, наведува адвокатот.
Измените на Кривичниот законик беа донесени во септември 2023 година по скратена постапка со европско знаменце и предизвикаа силни реакции во јавноста.
Според претходните анализи на Коалицијата „Сите за правично судење“, поради измените настапија или требаше да настапат застарувања или преквалификации во повеќе предмети на поранешното Специјално јавно обвинителство и други високи корупциски случаи, меѓу кои „ТНТ“, „Талир“, „Талир 2“, „Трезор“, „Тарифа“, „Топлик“, „Титаник“, „Титаник 2“, „Тендери“, „Траекторија“, „Шпански скали“, „Таргет-Тврдина“ и дел од постапката против Стевчо Јакимовски.
Според критичарите на измените, нивните последици се непоправливи бидејќи, согласно уставното начело за примена на поблагиот закон, новите одредби продолжуваат да се применуваат и по евентуални идни законски измени.
