ЕУ застана зад Зеленски по новите критики од Трамп: „Можете да сметате на нас“

Лидерите на Европската Унија испратија порака на поддршка до украинскиот претседател Володимир Зеленски, во време кога тој повторно се соочува со критики од американскиот претседател Доналд Трамп. Европските челници порачаа дека ќе продолжат да ѝ помагаат на Украина и се спротивставија на ублажувањето на санкциите против Русија.

„Можете да сметате на нас“, изјави претседателот на Европскиот совет, Антонио Кошта, на средбата со Зеленски и претседателката на Европската комисија, Урсула фон дер Лајен, во Брисел.

— реклама —

Трамп неодамна повика на смена на украинскиот претседател, а истовремено ги олесни санкциите против Русија, дозволувајќи ѝ да извезува дизел. Овој потег беше претставен како обид за намалување на рекордно високите цени на горивата.

Кошта оцени дека во актуелните околности не треба да се намалува притисокот врз Москва, туку, напротив, да се засили поддршката за Киев.

— реклама —

„Ова не е време за ублажување на санкциите кон Русија. Сега е време да ја зголемиме нашата поддршка за Украина и да го засилиме притисокот врз Русија“, рече тој.

Во неделата, Трамп еднострано прогласи енергетско примирје меѓу Русија и Украина, обвинувајќи го Зеленски дека нападите врз руските рафинерии придонесуваат за растот на светските цени на нафтата. Обидот за примирје, сепак, набрзо пропадна.

Фон дер Лајен нагласи дека Европската Унија нема да ги укине санкциите додека Русија не ја запре војната. Таа додаде дека ЕУ го поддржала предлогот на Трамп за енергетско примирје, но оти Русија не го почитувала.

— реклама —

„Едно нешто е сосема јасно. Нема да укинеме никакви санкции додека Русија не ја запре војната. Ние го поддржавме енергетското примирје на претседателот Трамп, но видовме дека Русија воопшто не го почитуваше ниту една минута“, изјави Фон дер Лајен.

Европските лидери треба да разговараат и за дополнителна финансиска помош за Украина во наредните години. ЕУ минатата година договори заем од 90 милијарди евра за Киев, наменет за 2026 и 2027 година.

— реклама —

Иако украинскиот буџет за годинава е целосно покриен, властите во Киев предупредуваат дека во 2027 година може да се соочат со значителен недостиг на средства.

Украинскиот министер за финансии, Серхиј Марченко, минатиот месец изјави дека на земјата ѝ недостигаат 32,6 милијарди долари за економска поддршка и дополнителни 45 милијарди долари за одбраната.