Евертон би можел да добие нов сопственик, Фридкин групацијата размислува за продажба

Групацијата Фридкин (TFG) соопшти дека сака да го продаде мнозинскиот пакет акции во фудбалскиот клуб Евертон, со цел да му овозможи на клубот дополнително да напредува.

Како што се наведува во соопштението на групацијата, таа ги разгледува новите инвестициски можности за фудбалскиот клуб, вклучително и потенцијалната продажба на контролниот удел.

— реклама —

Од групацијата потсетија дека кога ја презеле грижата за Евертон, клубот се соочувал со значителна финансиска неизвесност и предизвици, како на теренот така и надвор од него.

„Непосреден приоритет беше да се обезбедат стабилноста, инвестициите и поддршката неопходни за да се гарантира иднината на клубот, вклучително и помошта за завршување на долго најавуваниот стадион за неговите верни навивачи“, се наведува во соопштението.

— реклама —

Во изминатиот период клубот се пресели од стадионот „Гудисон парк“, со капацитет од 39.414 места, на новиот стадион „Хил Дикинсон“, кој може да прими 52.769 гледачи, пренесува „Гардијан“.

Приходите на клубот значително се зголемиле само врз основа на продажбата на влезници.

„Сега, кога тие темели се безбедно поставени, вистинско време е да се разгледа следното поглавје за Евертон. Ќе ги разгледаме само понудите од страни за кои цврсто веруваме дека ќе бидат вистинските управители што ќе го водат клубот напред и ќе го надградат досега постигнатиот напредок“, се заклучува во соопштението.

— реклама —

Евертон е деветкратен шампион на Англија и се наоѓа на петтото место на вечната листа според бројот на освоени шампионски титули. Сепак, клубот нема освоено првенствена титула од 1987 година.

Последниот трофеј го освои во 1995 година, кога по петти пат триумфираше во ФА Купот.

Во сезоната 1984/85, Евертон го освои и Купот на победниците на куповите, меѓународно натпреварување кое во меѓувреме беше укинато.

Во тековната сезона, Евертон нема пораз по пет одиграни кола. Со две победи и три нерешени средби, моментално се наоѓа на седмото место на табелата во Премиер лигата.