Евролигата продолжува со трансформацијата кон франшизен модел, а напуштањето на натпреварувањето во иднина би можело да стане исклучително скапо за секој клуб што ќе одлучи да замине.
На состанокот одржан во петокот, Евролигата официјално го потврди почетокот на преминот кон франшизен систем, при што сите 13 клубови-акционери остануваат дел од елитното европско кошаркарско натпреварување, меѓу нив и Реал Мадрид.
Едно од клучните прашања во новиот модел е значителното зголемување на откупната клаузула за излез од Евролигата. Според информациите на „Еурохупс“, иако претходно се споменуваше сума од 100 милиони евра, конечниот износ би можел да достигне дури 200 милиони евра.
Следната сезона најдобрите европски клубови и натаму ќе настапуваат во Евролигата, бидејќи проектот на НБА за европско натпреварување сè уште е во фаза на развој. Поради тоа, клаузулите за напуштање на лигата остануваат на сила.
Тоа значи дека секој клуб што ќе сака да се приклучи на евентуално ново натпреварување ќе може да ја напушти Евролигата, но само по плаќање на висока отштета.
Во моментов, откупната клаузула изнесува 10 милиони евра, на што дополнително се пресметува и надомест за настаната штета. Токму оваа ставка, според најавите, би можела драматично да се зголеми и веќе следната година да достигне дури 200 милиони евра.
Клучен елемент во новиот модел е формулацијата „надомест за штета“, чија вредност ќе зависи од растот на пазарната вредност на Евролигата. Со оглед на финансискиот раст што го бележи европската кошарка во последните години, не е исклучено и сумата од 200 милиони евра во иднина да стане уште поголема.
